Sicilia si pigghiò li figghi 'i matri

Sicilia assai chiancìu pi' lu focu
ca ggenti tinta e 'nfami appicciò 'n locu
e làrimi pisànti nni spargìu
quannu arrubbàru o' ciumi 'u ben di Diu.
Fìciru ponti 'nta la sciàra sicca
cu' tanta rina e ferru picca picca.
Iccàru lu vilènu 'nta lu mari:
supra 'i balàti trigghi e calamari.
Fora ri testa pi' lu gran duluri,
Sicilia s'arraggiò, fici rumuri.
'A Terra e l'Acqua - ntìsi 'i sô ragiùni -
vòsiru fari rapprisintaziùni:
isàru 'a tila nìvura i tiatri...
e Idda si pigghiò li figghi 'i matri.

Fotoi e versi di Leo Sinzi